KUJDESI NDAJ TEMPERATURAVE TË LARTA
Në sheshin “Nënë Tereza” është vendosur tenda për promovim shëndetësor nga ora 10:30- 14:00. Profesionistët Shëndetësor të KPSH-së të Kryeqytetit për shkak të temperaturave të larta kanë filluar me ofrimin e shërbimeve shëndetësore si matje të tensionit arterial, parametrave vital, ofrim të këshillave mjekësore për qytetarët tanë si të mbrohemi nga nxehtësia dhe temperaturat e larta që këtyre ditëve po mbretërojnë në vendin tonë. Gjatë aktivitetit i pranishëm ishte edhe Drejtori i DSH të Kryeqytetit Dr. Izet Sadiku, drejtori i QKMF-së Dr.Bujar Gashi dhe drejtori i QMU-së Dr.Avdyl Pacolli, me ç’rast ata këshilluan qytetarët si të mbrohen dhe ti përballojnë sa më lehtë e pa pasoja shëndetësore këto temperatura të larta. Valët e të nxehtit mund të ndikojnë negativisht në shëndetin dhe mirëqenien e qytetarëve dhe sidomos te grupet e ndjeshme të popullatës siç janë: Shtatëzënat, të porsalindurit, fëmijët, të moshuarit, personat me sëmundje kronike si: Sëmundjet e mushkërive, sëmundjet kardiovaskulare, diabeti, sëmundjet mendore, sëmundjet e veshkave etj. Simptomat më të shpeshta të ndikimit të temperaturave të larta mund të jenë: Ngritje ose dobësim i pulsit, ngërqet e muskujve, dhimbje koke, djersitje, ndjenja e përgjithshme dobësie, lëkura e nxehtë dhe e thatë, marramendje, urina me ngjyrë të errët, nauze ose të vjella etj.
Qytetarë të nderuar mundohuni të mos dilni nga shtëpia në orët e nxehta të ditës (10:00-17:00)
Këshilla për tu mbrojtur nga temperaturat e larta: Pini ujë rregullisht edhe nëse nuk keni etje, vishni rroba të lehta pambuku dhe me ngjyra të çelëta, bartni syze dielli, kur dilni nga shtëpia vendosni kapelë, përdorni krem mbrojtës nga dielli në lëkurë, aktivitetet fizike mund ti kryeni në mëngjes ose në mbrëmje kur moti është më i freskët, qëndroni në hije ose brenda, bëni dush ose banjo të freskëta, konsumoni më shumë pemë dhe perime të freskëta. Gjatë aktivitetit janë shpërndarë materiale edukativo-shëndetësore.
Ju lutemi për çdo shqetësim, simptomë, këshillim kontaktoni shërbimet e Mjekësisë Familjare.